Номер 5, страница 5 - гдз по белорусскому языку 7 класс учебник Валочка, Зелянко

5. Прачытайце тэкст. Раскажыце на яго аснове аб правілах маўленчых паводзін.

Правілы маўленчых паводзін з'яўляюцца нацыянальна спецыфічнымі, у іх увасоблены псіхалогія і культура народа. Яны адлюстраваны ў сістэме прынятых грамадствам устойлівых формул і выразаў.

Маўленчы этыкет, напрыклад, патрабуе:

1. Уважліва слухайце тых, з кім гаворыце. Не перабівайце. Перш чым пярэчыць, даслухайце выказванне да канца. Калі ў размове вас перабілі, не старайцеся перакрычаць, даслухайце пярэчанне, а потым ужо гаварыце.

2. Пры размове глядзіце на таго, з кім гаворыце. Не хапайце яго за рукі, не круціце гузікі*, не ляпайце па плячы. Старайцеся не жэстыкуляваць у час размовы. Не крычыце, не смейцеся занадта доўга ці вельмі моцна.

3. Не зневажайце прысутных. Калі вы хочаце пажартаваць, рабіце гэта так, каб не закрануць самалюбства тых, з кім гаворыце. Зусім недарэчныя жарты са знешнасці людзей ці з іх імёнаў. Чалавек не вінаваты ў тым, што ён дрэнна бачыць ці дрэнна чуе, ці ў тым, што бацькі далі яму нейкае незвычайнае імя.

4. Захоўвайце спакойны тон размовы, не спяшайцеся, не крычыце. Старайцеся выказацца тактоўна, не абражаючы таго, з кім гаворыце.

5. Ветлівы і тактоўны чалавек не забудзецца:

• першым сказаць «добры дзень»;

• любую просьбу выказаць са словамі «калі ласка», «будзьце ласкавы»;

• за ўсякую ўвагу ці аказаную паслугу падзякаваць і адказаць тым самым;

• калі сам выпадкова патрывожыць каго-небудзь, сказаць «прабачце, калі ласка», «выбачайце».

Разгледзьце ілюстрацыю да тэксту. Маўленчы этыкет якога часу на ёй перададзены?

На ілюстрацыі перададзены маўленчы этыкет ХІХ стагоддзя.